أول شي نجيب دجاجة نقطعها أرباع ونشيل منها الجلد (وممكن صدور دجاج أو أفخاذ زي ماتحبوا ) ونفركها بملح ودقيق وليمون وننقعها شوية في ليمون وخل وزبااااادي لمدة ربع ساعة نغسلها من اللبن ونحطها في قدر ونسلقها بموية مضاف عليها ملح وشوي بهارات صحيحة لكل من ( شيبة وخولنجان وهيل وفلفل أسود) ونشيل الزفرة كل ماظهرت بعد ماتستوي نطلع الدجاج من ماء السلق ونحتفظ بماء السلق بعد مانصفيه نقطع 3 حبات بصل إلى جوانح ونحمرها بشوية زيت عالنار ونضيف لها ثوم و 3حبات جزر مبشور ونص كأس زبيب منقوع في موية حارة لمدة ثلث ساعة ومصفى وملعقة زنجبيل مطحون وملعقة صغيرة عصفر (نوع من البهارات يشبه الزعفران) ورشة كاري وحبة ماجي وملعقة صغيرةلكل من( كمون- كزبرة- أجينو موتو- قرفة مطحونة - بهارات مخلوطة من عمايل يدين الوالدة الله يحفظها)
وحبتين فلفل حار مقسوم نصين (طبعا أنا عشان الصغار ماحطيته) حطيت بداله فلفل رومي ونقلبه
نحط الدجاج عالخلطة السابقة وشبت مفروم كاسةونص أوكاستين وملعقتين سكر محروق
وشوي من مرقة الدجاج مانكثر بس عشان الخلطة ماتكون ناشفة وتنحرق ونغطي عليه ونخليه على نار هادئة جدا لمدة عشر دقايق عشان يتسبك هنا أضفنا السكر المحروق نسلق الرز بمرقة الدجاج ونضيف عليه 3ملاعق ماء كادي ومكعب ماجي للرز الأبيض
ونكون منقعين زعفران من البداية في موية كادي
بعد ماتنشف موية الرز نأخذ شوية من الرز ونحط خلطة الدجاج عالجزء اللي في القدر ونرجع نحط الرز اللي أخذناه فوقها ونرش عالوجه موية الزعفران وربع أصبع زبدة مقطع شرائح ونخليه على نار هادئة جدا لمدة ربع ساعة نقلبه في صحن كبير ونخلطه ونغرفة في الصحن ويزين بلوز حجازي مقلي وبقدونس ونعناع مفرومين
ويقدم معاه سلطة لبن مع خيار ونعناع ودقوس(فلفل مطحون بالحمر) وبيبسي
طريقة سلطة اللبن ..
نبشر حبتين خيار ونضيف لهم ملعقة بقدونس وملعقة نعناع وملعقة صغيرة ثوم مطحون وملعقة صغيرة كمون ورشة ملح ورشة فلفل أسود وعلبتين زبادي وفنجان لبن سائل ونخلطهم مع بعض طريقة الدقوس بالحمر::
حبتين فلفل قرون حار أو حسب الرغبة
3حبات طماطم
شوية كزبرة وبقدونس
ملح حسب الرغبة
كمون كيس حمر صغير منقوع بنص كاسة موية حارة
نصفي الحمر ونحط كافة المقادير بالخلاط ونخلطهم.
الأحد فبراير 12, 2012 7:24 pm
